|
| |
| Najhuja vrst anonimusi? Definitivno ona ka jaše po internetu pa komentira i komentira potpišujuć se z timi prčvarcimi. To j nesnaga kakove ni, čast izuzecimi i poštenomu svitu | |
 Već fanj vrimena mislin zač va zadnjeh par let si žele bit anonimni. Ljudi prez imena, prezimena i sega ča to dvoje sobun nosi. Ča j tomu razlog. Strah? Od koga, od česa? Tr smo va demokracije nismo va onomu škuromu totalitarizmu va komu te j moglo radi jedne krive besedi pospravit vrešt, poslat na on otok, stuć i se ono drugo ča povedaju da j bilo va to vrime. Va demokracije je, baren bi trebelo bit, na snage sloboda govora i kad neš rečeš niki ti niš ne bi smel načinit. I zač onput ta anonimnost? Ma ne i muk, aš si povedaju, si neš pišu i kad dojdu do kraja toga ča reču ale napišu, ne predstave se z imenon i prezimenon. Dijagnoza Ki nasliše onu Ferlinovu emisiju ka se zove »Tužibaba« sako malo more čut toga istoga Ferlina kako reče – e, ovo pismo, ale ovaj mejl neću pročitat aš se on ki ga j pisal ni potpisal. I stalno sirota kod papagalo ponavlja kako se ča dojde nepotpisano neće pušćat va eter, a ljudi stalno pišu i ne potpišuju. Isti slučaj je i pu nas va rubrike Reagiranja. Neki se trsi pa napiše i pet stranic teksta, a onput se ne potpiše. Zač je ta isti pisal, zač je gubil vrime ako zna da to ča j napisal prez potpisa i atresi nikad neće zić va novine? Onput mi nisu ćari ni si oni ki pozivaju na telefon, ne daju do besedi doć, zijaju, suju, spominju ti vas rod i porod i onput namesto da reču – ovo san ti rekal ja zato i zato, spušćaju slušalicu. A da ni ne govorin za one ki šalju listi i dopisnice na keh natrtljaju sakoga vranića, napišu takove stvari da jih ni pas z maslon ne bi pogutnul i ča? Ne potpišu se. Znate vi kuliko j tu truda – rabi poć kupit list, rabi kupit marku, rabi napisat, onput to i odnest va poštu, a on na koga j to atresirano, to znan po sebe, najčešće ni ne pročita, aš ča ću čitat nekove šporkarije zad keh stoji nekakov anonimus. Verujte, takovi me nisu pojidali, a još manje razjadili ni kad san tek počela delat va novinarstvu, a kamo sad pokla trejset let. Za takovi ja iman jednu ladicu na koj piše »dijagnoza – bolje zgubit leh je nać« i se ča dojde prez potpisa hitin nutar, a da ni ne pogljedan. Morda i ću jednoga dana kad projden va penziju, ako ju opće doškan. Kuliko j takoveh va škabelinu? Verujte niman pojma, ma kup je fanj veli. Frustracija Oni pak ki zovu na telefon i se to odbave govoron, malo poslušan, a kad mi dosadi leh spušćan slušalicu kraj telefona i nastavni delat. On ale ona neka povedaju, tr neću ja platit. Jedanput, još početkon devedeseteh bil je jedan čovik ki me j saki dan zval va isto vrime i jedan dan bi mi zakljel mater ustašku, drugi četničku, treti bi mi rekal da san lokalpatriotski drek i sopeta spomenul mater i tako jedno dve šetemani. Kad mi j zaspraven već dosadilo pokle ča j on opet mane mater i ovu, i onu progovorila san i rekla – šjor moj dragi, vidin da van se moja mat jako pijaža, e pa lipo ona van je na toj i toj atrese, hote tamo, lipo ju pitajte i ako van da ja niman niš protiv. Nikada više ta isti me ni zazval, a ja i dan danas ni kriva, ni dužna z materun radi te štorije iman problem. Kade mi j bila pamet opće njoj to povedat? Najhuja vrst anonimusi? Definitivno ona ka jaše po internetu pa komentira i komentira potpišujuć se z timi prčvarcimi. To j nesnaga kakove ni, čast izuzecimi i poštenomu svitu ki komentira radi potrebe da reče svoje mišljenje, a ne da nekoga uvredi i očrni, a da ni ne zna ni koga, ni zač – leh radi zlobi. Takoven bin istoga časa klala zabranu pristupa na mrežu seh mrež aš kakov si ti čovik kad te j strah stat zad onoga ča misliš. Drek od čovika kod ča j i ova demokracija se leh je demokracija. Va njoj će prvo vrešt dospet novinar ki j svoje mišljenje potpisal leh se nesnagi prez imena i prezimena ke postoje leh da bi mrzile. Ovakova demokracija šegavomu čoviku ne more bit niš drugo leh frustracija. |
-----------------------
lp, boro
bglavac
irida
edin.kecanovic
