| obišli smo |
| Juraj i Mara – deca gromovnika Peruna i mit o njihovoj jubavi |
| Judi od struki počeli su po brege Perune iskat stari senjali božji i otkriveno je da j' Trebišće spod Peruna svojni bilo ne samo selo nego i božji oltar Piše Cvjetana MILETIĆ Slikali Marin ANIČIĆ i Livio ČERNJUL |
 Mošćenice probudilo jutarnje sunce. Vaje za ten opral ih daž. Nebo kot da se otprlo. Do večer se zmenjevalo malo sunca malo dažja. Va restorane »Perun« tekal je Šesti međunarodni znanstveni skup i pogovor kako su spod brega Peruna novo živjenje našli naši prapra i još čuda puti pra nonići al prvi Hrvati. Od kuda su prišli i kada? Je to bilo »od stoljeća sedmog« al još prej? Bila su to škura vremena kad se ni poznavalo pismo pa se niš ni zapiševalo. Zato j' sada onen od struki čuda teže otkrit štoriju skrivenu va stareh spomeneh. Neš je ostalo skriveno va zemje, kot ime brega, dolca, sela, vasi, potoka... Neš senjano va kamike na oltare, grobe, zide... A neki spomeni čepe pritajeni va besedah i sveteh kanteh. Se to rabi nać, prepoznat i rastumačit. A to ni lahko. Treba vremena, i znanja i pota. I puno voji. Sega tega našlo se va Mošćenicah pred ko leto i počelo stručno i pomalo otkrivat starinu. Sako leto neš. Kup novega i nepoznatega je rasal. A onda se to na skupe juden povedelo. Tako je bilo i ovisto. Skup je parićala Katedra Čakavskega sabora Mošćenička Draga, Općina Mošćenička Draga, Odsjek za etnologiju i kulturnu antropologiju Filozofskega fakulteta Zagreba i Park prirodi Učka, a pokrovitelj je po užance bila Hrvatska akademija znanosti i umjetnosti. Pred šest let povedalo se kako su breg Perun i bog Perun žensoti i ča bi reć da se breg s takoven imenon našal zgor Mošćenic. Va praslavenskoj mitologije Perun je bil nebeski bog gromovnik, ki mej rukami tare kamiki od žrni i z visin grmi i na zemju šaje šajeti. Govorilo se i o bogu Velesi i vekovitoj borbe mej njimi. Kad bi nadjačal Perun, juden je bilo boje, kad bi nadjačal Veles, juden je bilo slabeje. I tako let. A onput je prišlo kršćanstvo. Nova vlast je stari bogi branila pa su se oni malo pomalo zapustili i čuda se štorij o njimi pozabilo. Leta su pasevala, se manje se znalo i pred neko leto opet se počelo o njimi govorit. Judi od struki počeli su po brege Perune iskat stari senjali božji i otkriveno je da j' Trebišće spod Peruna svojni bilo ne samo selo nego i božji oltar. Nahajala su se i druga mesta s praslavenskemi imeni i otpirale štorijice od vremen ka su zdavni pasala. Šlo se i po Potoškoj vale, našlo Voloski kuk i preiskalo Potoku od zvira do mora. Sprotu otkrivalo otajstvene sliki nekadajneh bogi keh je kršćanstvo prezelo va se. Kad se doznalo ki su bili Perun i Veles na red su prišla i njiha deca. Zato je tema ovoletnega skupa bila: »Mit o djeci gromovnika Peruna – Juraj i sestra mu Mara«. Sala restorana »Perun« bila je puna kurijožeh judi. Neki su oteli čut te novitadi, a neki su prišli samo pozdravit. Od samega početka va ovoj su štorije prof. Veseljko Velčić i dr.sc. Tomo Vinšćak pak je i njihov »sveti greh« dofinit ča su počeli. Jedanput je Tomo Vinšćak napisal ovako: »Ono što predstavlja Olimp Grcima, Triglav Slovencima, Ararat Armencima, Kailas Tibetancima i Indijcima, to je Perun Slavenima i Hrvatima. Perun je sveta gora na kojoj obitava bog Gromovnik. U vrijeme doseljavanja Hrvata na današnje prostore vjerojatno je bilo više svetih gora s Perunom na vrhu. Koliko ih je bilo to ne znamo i možda nikada nećemo ni znati. Tragovi pretkršćanskih vjerovanja na području Hrvatske treba tražiti u svijetlu mikrotoponimije, hidronimije i topografije.« To ča j' Tomo Vinšćak onput rekal istina je po koj se ravnal i akademik Radoslav Katičić. Ćapal se velega dela i velo je delo odbavil. Povedal nan i ov put kako je knjiga Ivanova i Taparova za njega imela čudesnu moć, a kad je kašneje još i upoznal Ivanova, kockice su se počele same slagat. Ćutil je da j' na slede jenega otajstva i počelo je njigovo dugo, dugo istraživanje, otkrivanje, zapiševanje, objavjivanje... Čuda je trebalo dokle j' na kup pospravil jedan svet kega već nekoliko veki ni. Kad se tega nabralo dosta, stavil je se to va knjigu »Božanski boj«. Kolik je valor knjigi najboje govore nagradi. Knjiga je najprej dobila »Juditu«, kot knjiga ka ima najveću kulturnu baštinu, a onput i nagradu Matice hrvatske »Oton Kučera« kot najboja znanstvena knjiga. Va njoj je gospodin Katičić otkril ono ča povjesničari nisu mogli aš oni nisu šli »tragom svetih pjesama naše pretkršćanske starine«. Bilo je to delo za jenega lingvistu, velega filologa kot ča j' gospodin Katičić, ki je s čuda znanja i čuda sreći prišal do srca praslavenske mitologije i znel zamućenu koltrinu z dela naše predkršćanske starine. Skroz svete pjesmi Katičić je zagnjeral ne samo va praslavensku, nego i va baltoslavensku i indoevropsku pretkršćansku starinu. Va sen ten hrvaska štorija je samo jedan mićihni delić za kega se morda nikad i ne bi bilo znalo da mu ni on pomogal prit na svetlo dana. I tu je gospodin Katičić za Mošćenice storil više od sveca. Sada se zna kako je zgledala mitska slika sveta stareh Slaveni. Na vrhe svetega dreva živel je bog Perun. Dole va korenen i vode bog Veles. Prvi je odzgora delil pravicu, čuval mir i sreću judi. Drugi je odzdola bil bog blaga, zemji, vodi i mrtveh. I mej njimi je vladal vekoviti rat. Pol leta je bila bogatija na zemje, polovicu zima i glad. A mej njimi je bila i Mokoš, žensko božanstvo rad ke se ratovalo. Ona je pol leta bila žena Perunu, a pol leta je jubovala z Veleson. Breg Perun zgor Mošćenic još vavek skriva se neka otajstva. Prazna sela Trebišće i Petrebišće Perunu spod pazuh govore da se tu svojni lepo živelo. Do pred desetak let živjenja je bilo ia va sele Potoki. A voda Potok svojni je živjenje davala celemu kraju. Boga Peruna prikažuju kot nebeskega boga munje i groma, a Velesa kot velu kašku al zmaja, ki se skriva mej koreni duba va vode. Va vekovitoj borbe zmej boga od neba i boga od zemji, najveć puti je Perun jači pa potisne Velesa mej korene duba, ale ubit ga ne more aš je i Veles božansko telo. Tako njih dva držala kontrapezu zmej dobrega i lošega. Se j' to zapisano va knjige »Božanski boj«, ka će bit od koristi i juden i struke, a za storit ju moral je gospodin Katičić proučit svete pjesmi zapisane na trejsetak zajik i nać va njih očuvanu saku mrvicu praslavenskeh obredneh užanci. Onputa je šal korak naprvo. Otkril nan je ku su decu imeli i bog Perun i bog Veles. Ovako j' povedal: »Istraživanje je bilo fragmentarno i ta je razlomljenost sintetizirana u knjizi »Zeleni lug«. Lug je praslavenska riječ, u izvornom je obliku sačuvana još u jeziku Bjelorusije. Ulomke je, naravno, trebalo prepoznati, objasniti, složiti...« Tako je z besedami risal rojenje svoje nove knjigi, a mi smo gledali va njega kot va Boga dokle je on tumačil kako je bog Perun imel sina Jarila kega mu bog Veles ukral dokle j' mali bil još va zibele i odgajal ga mej svojemi hćerami. Kad je Jarilo postal mladić Veles ga pustil va gornji svet da poišće ženu »dostojnu« njigovega imena. A jedina dostojna je bila Mara, hćer boga Peruna. Tako se Jarilo oženil i ne znajuć za rojenu sestru. To je bila grda osveta boga Velesa i još grja nesreća za mladega Jarila. Kad je Jarilo istinu doznal, bilo je kasno. Već se dogodilo se ono ča se i danaska dogaja mladen kad legnu va lug na zelenu travu... Ča je bilo daje? Jarilo znači jarovit, mladost puna životne snagi, a Mara kot nevestica drži v ruke zlatnu jabuku. Jabuka od zlata je senjal okrugle munji. On jarovit, ona z munjun v rukah. Piše se grd finjetak. Do osveti je prišlo kad je Jarilo prevaril Maru. S kun? Marineh devet brati ubilo je Jarila. Mara mu telo raskomadala. Pa sejeno još škakje ono pitanje sporad ke ženske je Jarilo glavu zgubil? Va litvanskoj predaji to je Zora, drugde se spominje Danica, a negdere Morana. Vavek jeno otajstvo raja drugo pa treba čekat zadnju besedu struki. Homo opet sledić nazad va vreme kad je z velemi koraki prihajalo kršćanstvo. Poganski su se miti pritajili. Neki su se bogi skrili va noveh štorijah od kršćanstva. Tako je od Jarila postal Sv. Juraj. Morda je onaj veli zmajina kega Juraj ubija Veles? Ki zna?! Kad je Jarilo postal Sv. Juraj kršćanstvo je već mastilo z velemi koraki naprvo. Po gradeh su se zidale crekvi i svetac je postajal njihov patron. Do danas su očuvane Crekvi sv. Jurja va Plomine, Brseče i Lovrane. Je bila kade još ka, treba otkrit. Sveta su mesta vavek poveževale tri točki ke su mej sobun delale trokut. Takovi sveti trokuti va oveh krajeh našal je prof.em.ffzg.Vitomir Belaj. Ovo je bila i njigova prilika da o sv. Jurju povede ku više, nego ča j' to storil va knjige »Hod kroz godinu«. Sv. Juraj je kršćanski svetac pogubjen 23. IV. 303. leta za vreme cara Dioklecijana kad se još progonilo kršćani. Ale pisaneh dokumenti ni. Grob sv. Jurja je va Lyddi, a čašćenje se proširilo va peten veke. »Pa ipak je papa Gelazije 496. godine odbacio vitu kao apokrifnu, ali je štovanje u Rimu potvrđeno 23. IV. 684. godine. Priča o Jurjevoj borbi sa zmajem nastala je negdje na istoku, a posredstvom arijanske kršćanske literature dospjela je na zapad. Talijanski biskup Jakob iz Voragina sastavio je zbirku životopisa svetaca »Zlatnu legendu« i u nju stavio motiv borbe sv. Jakova sa zmajem pa se ta slika sv. Jurja prenosila dalje. Juraj je kopljem ranio zmaja i dalje ga zmaj slijedio poput psa kada ga Juraj vodio pokazati caru. Taj je motiv na freskama, ikonama, u književnosti i crkvenim zapisima, no pored sv. Jurja zmaja ubijaju i sv. Margareta Antiohijska i sv. Marta, pa sv. Mihovil i židovski kralj Salamon,« pričao je gospodin Belaj i pokazivao sveti trokut kojeg čine Perun, Trsat i Volosko, a potom i one u Istri i duž Jadrana. »Dosadašnja istraživanja na području Peruna i Trebišća dala su izvrsne rezultate. Stoga veseli što nam je Općina Mošćenička Draga ustupila i jednu napuštenu kuću u Trebišću u kojoj će biti budući muzej. Za sada imamo samo fotografije, ali uskoro ćemo unijeti i uporabne predmete pa će Muzej biti otvoren gostima namjernicima, planinarima i turistima, svima koji žele upoznali povijesne i kulturne znamenitosti ovog kraja,« rekal je na kraje i Tomo Vinšćak pa pozval seh na Trebišće. Do gore te ih pejat judi s Parka prirodi »Učka« ki su i parićali ovu stazu do muzeja i do vrha Peruna. Za to vreme presedniku Katedri Čakavskega sabora Mošćenička Draga Veseljku Velčiću rasli su krejuti od sreći aš je storeno više leh se nadal. Samo, to je već druga štorija. |
Preuzeto iz Novog Lista http://www.novilist.hr/
pod Besedom, na dan današnji. Hvala dragoj Sanji na tekstu.
lp, boro
bglavac
irida
edin.kecanovic
